नुवाकोट — बेलकोटगढी नगरपालिकाको आयोजनामा “दशौँ झिल्टुङ क्रस कन्ट्री दौड प्रतियोगिता–२०८२” तथा विविध सांस्कृतिक कार्यक्रम आगामी माघ ८ गतेदेखि १० गतेसम्म हुने भएको छ। नगरपालिकाको बाघखोरस्थित कोल्पुटार क्षेत्रमा आयोजना हुने उक्त कार्यक्रमले खेलकुद, संस्कृति र पर्यटन प्रवर्द्धनमा महत्वपूर्ण योगदान पुर्याउने विश्वास गरिएको छ।
नगरपालिकाले अघि सारेको “शिक्षा, स्वास्थ्य, कृषि, पर्यटन लगायतका पूर्वाधारमा अभिवृद्धि : बेलकोटगढी नगरपालिकाको समृद्धि” भन्ने मूल नारालाई आत्मसात गर्दै आयोजना हुन लागेको यस कार्यक्रममार्फत स्थानीय पहिचानलाई राष्ट्रियस्तरसम्म पुर्याउने उद्देश्य लिइएको छ। साथै “जे गरौँ, गजबले गरौँ” भन्ने सन्देशसहित कार्यक्रमलाई भव्य र व्यवस्थित रूपमा सम्पन्न गर्ने तयारी गरिएको आयोजकले जनाएको छ।
कार्यक्रम अन्तर्गत झिल्टुङ क्षेत्र केन्द्रित क्रस कन्ट्री दौड प्रतियोगितासँगै विविध सांस्कृतिक प्रस्तुति, लोकनृत्य, झाँकी प्रदर्शन तथा मनोरञ्जनात्मक कार्यक्रमहरू समावेश गरिनेछ। प्रतियोगिता तथा सांस्कृतिक कार्यक्रममा राष्ट्रिय तथा स्थानीय कलाकारहरूको उल्लेखनीय सहभागिता रहनेछ। कार्यक्रममा चर्चित गायक–गायिका किरण भुजेल ,सरोज लामिछाने ,प्रतिमा आर्यल ,प्रदिप रोका,स्मृति गौतम,सीता सुवेदी ,भिमसेन खतिवडा ,सारादा रसाइली ,लक्ष्मी दर्लान तिर्सना बराइली ,सबिता ढुंगाना लगायत कलाकारहरूको प्रस्तुति रहने जनाइएको छ।
बेलकोटगढी नगरपालिका धार्मिक, ऐतिहासिक तथा पर्यटकीय स्थलहरूले सम्पन्न क्षेत्रका रूपमा परिचित छ। झिल्टुङ क्रस कन्ट्री दौडमार्फत निरञ्जना मन्दिर, चिठ्टेश्वर मन्दिर, सहिद पार्क, गणेशस्थान मन्दिरलगायत पर्यटकीय स्थलहरूको प्रवर्द्धन गर्नुका साथै स्थानीय पर्यटन प्रवाह वृद्धि गर्ने लक्ष्य लिइएको छ।
आयोजकका अनुसार कार्यक्रममा समाजसेवी, बुद्धिजीवी, खेलप्रेमी, युवा तथा सम्पूर्ण नगरवासीको सक्रिय सहभागिता रहने अपेक्षा गरिएको छ। यस किसिमका कार्यक्रमहरूले नगरको सामाजिक एकता, स्वास्थ्य सचेतना र खेल संस्कृतिको विकासमा टेवा पुग्ने विश्वास व्यक्त गरिएको छ
बेलकोटगढी नगरपालिकाले यसअघि पनि निरन्तर रूपमा खेलकुद तथा सांस्कृतिक गतिविधि आयोजना गर्दै आएको छ। दशौँ संस्करणमा प्रवेश गरेको झिल्टुङ क्रस कन्ट्री दौड प्रतियोगिताले बेलकोटगढीलाई खेल पर्यटनको प्रमुख गन्तव्यका रूपमा स्थापित गर्न सहयोग पुग्ने आयोजकको भनाइ छ।
Comments
Post a Comment