दाङको राप्ती गाउँपालिका, वडा नं. ३ मा सालको रुखमा आगो नियन्त्रणमा

 
दाङ, राप्ती गाउँपालिका–३।
दाङको राप्ती गाउँपालिका वडा नं. ३ स्थित श्रीचौर खेलमैदानमा रहेको सालको रुखमा लागेको आगो करिब पाँच घण्टापछि नियन्त्रणमा आएको छ।
रुखमा लागेको आगो राप्ती गाउँपालिकाको मिनी दमकल, स्थानीय युवा, प्रहरी तथा सर्वसाधारणको सक्रिय सहभागितामा निभाइएको हो। स्थानीय युवा अभियन्ता प्रकाश शाहीका अनुसार, सालको रुखको बीच भाग सुकेको र धोद्रो भएकाले आगो नियन्त्रणमा लिन लामो समय लागेको हो।
स्थानीयवासीका अनुसार, प्रदेश मन्त्रालय क्षेत्रभित्रबाट उत्पादित फोहोर खेलमैदानको चौरको किनारामा थुपारिएको थियो। सोही फोहोरमा आगो लगाउँदा बालबालिकाले रुखमा पनि आगो सल्काएको हुन सक्ने आशंका गरिएको छ।
घटनाप्रति स्थानीय युवाहरूले राप्ती सब–डिभिजन वन कार्यालयको लापरवाहीप्रति आक्रोश व्यक्त गरेका छन्। आगो लागेको स्थान नजिकै वन कार्यालय भए पनि आगो निभाउन कुनै भूमिका नखेलेको भन्दै उनीहरूले आपत्ति जनाएका छन्।