बेलकोटगढी (नुवाकोट), पुस २० – बेलकोटगढी नगरपालिका–५, दुईपिपल डबलीस्थित श्री कामरुदेवी माध्यमिक विद्यालयमा एक विशेष अभिभावक भेला सम्पन्न भएको छ। कार्यक्रममा विद्यालयको शैक्षिक गुणस्तर, भौतिक संरचना सुधार तथा विद्यार्थीहरूको समग्र विकासका विषयमा व्यापक छलफल गरिएको थियो।
कार्यक्रमका प्रमुख अतिथि नगरप्रमुख श्री जगतबहादुर गुरुङले विद्यालयलाई आवश्यक पर्ने पूर्वाधार निर्माणमा सहयोग गर्ने प्रतिबद्धता जनाउँदै विद्यालयको प्रगति नगरको गौरवसँग जोडिएको बताउनुभयो। उहाँले विद्यालयको विकासका लागि नगरपालिकाबाट सक्दो सहयोग पुर्याइने उल्लेख गर्नुभयो।
विशेष अतिथि श्री शिवप्रसाद दाहालले विद्यालयको समग्र हितका लागि निरन्तर सहयोग गर्न तयार रहेको बताउनुभयो। त्यस्तै, वडा अध्यक्ष श्री मदन भुजेलले विद्यालयका हरेक क्रियाकलापमा वडा कार्यालय सधैं सहकार्य गर्न इच्छुक रहेको बताउनुभयो।
विद्यालयप्रति निरन्तर माया र चासो राख्दै आफ्ना व्यस्त समयबीच उपस्थित हुनुभएका श्री शुदर्शन नेपाल र श्री नारायण नेपाल लगायत विभिन्न विद्यालय व्यवस्थापन समितिका अध्यक्षहरू, प्रधानाध्यापकहरू, जनप्रतिनिधिहरू, अभिभावक, सरोकारवाला तथा शिक्षाप्रेमीहरू पनि कार्यक्रममा उपस्थित थिए।
विद्यालय व्यवस्थापन समितिका अध्यक्षले कार्यक्रम सफल पार्न सहयोग पुर्याउने सम्पूर्ण महानुभावहरू प्रति हार्दिक आभार व्यक्त गर्दै विद्यार्थीहरूलाई अझ राम्रो शैक्षिक वातावरण सिर्जना गर्न विद्यालय प्रतिबद्ध रहेको बताउनुभयो।
Comments
Post a Comment