नुवाकोट — बेलकोटगढी नगरपालिका अन्तर्गत पर्ने कोल्पुटार–दुईपिपल–दियाले–झ्याङ्ली सडक पिच (कालोपत्रे) गर्ने कार्य तीव्र रूपमा अगाडि बढिरहेको छ।
वर्षौंदेखि कच्ची सडकका कारण धुलो, हिलो तथा आवतजावतमा समस्या भोग्दै आएका स्थानीयवासीका लागि यो सडक निर्माण कार्य महत्वपूर्ण उपलब्धि मानिएको छ। हाल सडकमा ग्राभेल बिछ्याउने र कालोपत्रे गर्ने काम द्रुत गतिमा भइरहेको निर्माण पक्षले जनाएको छ।
यसैबीच, निर्माण कार्यको स्थलगत निरीक्षण मदन भुजेल (वडा नं. ५ का अध्यक्ष) तथा नगरप्रमुख सहितको टोलीले गरेको छ| निरीक्षणका क्रममा जनप्रतिनिधिहरूले निर्माण कार्यको गुणस्तर र समयसीमा भित्र सम्पन्न गर्न निर्देशन दिएका छन्।
स्थानीयवासीहरूले सडक पिच हुन थालेपछि खुसी व्यक्त गरेका छन्। उनीहरूका अनुसार अब यात्रा सहज हुने, सवारी साधन सञ्चालनमा सहजता आउने तथा दैनिक जीवनमा ठूलो राहत पुग्नेछ।
एक स्थानीयले भने, “पहिले वर्षायाममा हिँड्नै गाह्रो थियो, अब सडक पिच भएपछि धेरै सहज हुन्छ।”
सडक निर्माण सम्पन्न भएपछि यस क्षेत्रको यातायात, व्यापार तथा आर्थिक गतिविधिमा सकारात्मक प्रभाव पर्ने विश्वास गरिएको छ। साथै शिक्षा, स्वास्थ्य लगायत आधारभूत सेवामा पहुँच समेत सहज हुने अपेक्षा गरिएको छ।
Comments
Post a Comment