साहित्यसँगै पर्यटन प्रवर्द्धन : ‘आठौँ नुवाकोट साहित्य पदयात्रा–२०८३’ भव्य रूपमा सम्पन्न

नुवाकोट, बैशाख — नेपाली साहित्यको उत्थान, स्थानीय कला–संस्कृतिको संरक्षण तथा ओझेलमा परेका ऐतिहासिक एवं पर्यटकीय क्षेत्रहरूको प्रवर्द्धन गर्ने उद्देश्यसहित आयोजित “आठौँ नुवाकोट साहित्य पदयात्रा–२०८३” शनिबार भव्य रूपमा सम्पन्न भएको छ। नुवाकोट साहित्य प्रतिष्ठान नेपाल को आयोजनामा सम्पन्न उक्त कार्यक्रमले साहित्यलाई प्रकृति, भूगोल र स्थानीय पहिचानसँग जोड्ने महत्वपूर्ण प्रयास गरेको सहभागीहरूले बताएका छन्।पदयात्रा विदुर नगरपालिका को बट्टारबाट सुरु भएको थियो। 
‎
विभिन्न साहित्यकार, कवि, लेखक तथा साहित्यप्रेमीहरू सहभागी रहेको टोली ऐतिहासिक तथा सांस्कृतिक महत्त्व बोकेको बेलकोटगढी नगरपालिका हुँदै धार्मिक तथा प्राकृतिक सौन्दर्यले भरिपूर्ण चिम्टेश्वर क्षेत्रमा पुगेर कार्यक्रम सम्पन्न गरिएको थियो।पदयात्राका क्रममा सहभागीहरूले नुवाकोटका ग्रामीण बस्ती, प्राकृतिक दृश्य, स्थानीय संस्कृति र धार्मिक सम्पदाको अवलोकन गरेका थिए। यात्राभर विभिन्न स्थानमा साहित्यिक छलफल, कविता वाचन तथा सिर्जनात्मक अन्तरक्रिया समेत गरिएको थियो। सहभागी स्रष्टाहरूले प्रकृतिको काखमा यात्रा गर्दै सिर्जनशील भावनालाई अझ नजिकबाट अनुभूति गर्न पाएको बताएका थिए।

‎
संस्थाकी उपाध्यक्ष जानुका दाहाल ले साहित्य केवल पुस्तकभित्र सीमित विषय नभई समाज, भूगोल र जनजीवनसँग प्रत्यक्ष जोडिएको अभिव्यक्ति भएको बताइन्। उनले साहित्यिक पदयात्राले स्थानीय पहिचानलाई राष्ट्रियस्तरमा चिनाउन महत्वपूर्ण भूमिका खेल्ने विश्वास व्यक्त गरिन्।त्यसैगरी संस्थाका संस्थापक अध्यक्ष श्रीराम श्रेष्ठ ले बेलकोटगढी र चिम्टेश्वर क्षेत्र ऐतिहासिक, धार्मिक तथा पर्यटकीय हिसाबले अत्यन्त महत्वपूर्ण भए पनि अपेक्षाअनुसार प्रचारप्रसार हुन नसकेको बताए। यस्ता पदयात्राले ती क्षेत्रलाई राष्ट्रिय तथा अन्तर्राष्ट्रिय स्तरसम्म चिनाउन सहयोग पुग्ने उनको भनाइ थियो।
‎
उनका अनुसार कार्यक्रममा आएका ख्यातिप्राप्त कवि, लेखक तथा स्थानीय स्रष्टाहरू गरी ५० जनाभन्दा बढीको सहभागिता रहेको थियो। कार्यक्रममा सहभागी साहित्यकारहरूले साहित्य र पर्यटनलाई एकसाथ अघि बढाउन यस्ता अभियान निरन्तर सञ्चालन हुनुपर्ने धारणा व्यक्त गरेका थिए।चिम्टेश्वर क्षेत्रको भ्रमण तथा अवलोकनपछि आयोजित औपचारिक साहित्यिक कार्यक्रममा विभिन्न स्रष्टाहरूले कविता, गीत तथा गजल प्रस्तुत गरेका थिए। कार्यक्रममा लोबहादुर पुडासैनी, भगवती खनाल, प्रमिला परी, सन्तोष भट्ट, मणी घिमिरे तथा करण तामाङ लगायतका स्रष्टाहरूले आफ्ना रचना वाचन गरी कार्यक्रमलाई आकर्षक बनाएका थिए।
‎
त्यसैगरी प्रकाश ढुंगाना, दीपक तिवारी, प्रकाश सडौला, रामप्रसाद चालिसे, रामचन्द्र ढुङ्गेल लगायतका व्यक्तित्वहरूले पनि आ–आफ्नो सिर्जनात्मक प्रस्तुति दिएका थिए। साहित्यिक वातावरण, प्राकृतिक सौन्दर्य र सहभागीहरूको उत्साहले कार्यक्रमलाई थप जीवन्त बनाएको थियो।कार्यक्रमकै अवसरमा प्रतिष्ठानद्वारा प्रकाशित साहित्यिक कृति मनका झिल्काहरु को विमोचन समेत गरिएको थियो। उक्त कृतिमा विभिन्न स्रष्टाहरूका कविता, लेख तथा सिर्जनाहरू समेटिएको जनाइएको छ।
‎
सहभागीहरूले यस्ता साहित्यिक पदयात्राले लेखक तथा स्रष्टाहरूलाई नयाँ परिवेशसँग परिचित गराउने, सिर्जनामा नवीनता ल्याउने तथा आन्तरिक पर्यटन प्रवर्द्धनमा सकारात्मक योगदान पुर्‍याउने विश्वास व्यक्त गरेका थिए। कार्यक्रमले साहित्य र पर्यटनलाई एकसाथ जोड्दै नुवाकोटको ऐतिहासिक तथा सांस्कृतिक पहिचान उजागर गर्न सफल भएको आयोजकको निष्कर्ष रहेको छ।